Slysavarnadeildin í Reykjavík, Slysavarnadeildin Dagbjörg, Björgunarsveitin Ársæll, Björgunarsveitin Kjölur og Unglingadeildin Árný taka virkan þátt í Hátíð hafsins. Hittu okkur um borð í Skólaskipinu Sæbjörg og fáðu þér vöfflu með rjóma eða við Gömlu sjóbúðina þar sem við grillum pylsur báða dagana og svo verður okkar rómaða kaffihlaðborð á sínum stað í Gróubúð á sunnudeginum.

Dagskrá hátíðarinnar er hér www.hatidhafsins.is

Slysavarnafélagið Landsbjörg stendur svo sannarlega fyrir meira en leit og björgun þó oftar rati í fjölmiðla fréttir af aðgerðum félagsins þegar einhver er týndur eða þegar óveður geisar og sjálfboðaliðar félagsins taka höndum saman um að bjarga fólki og verðmætum.  Félagið stendur líka fyrir öflugum slysavörnum og hefur náð ótrúlegum árangri í íslensku samfélagi í áratugi.

Í félaginu er fjöldi félaga sem starfa eingöngu að slysa- og forvarnamálum í sínu nærsamfélagi í samstarfi við björgunarsveitirnar og önnur félög og stofnanir.  Á höfuðborgarsvæðinu, vesturlandi, vestfjörðum, norðurlandi, austurlandi og suðurlandi eru sjálfboðaliðar félagsins að vinna að slysa- og forvörnum.  Félagarnir sinna störfum sínum í heilbrigðisstétt eru leikskólakennarar, kennarar, iðnaðarmenn og fagfólk úr ýmsum stéttum.  Við erum líka mömmur, pabbar, afar og ömmur og búum því yfir mikilli þekkingu þegar kemur að slysavörnum barna og fullorðinna, á heimilinu, í umferðinni og umhverfinu öllu.

Slysavarnadeildir félagsins hófu árið 1965 að beita sér fyrir notkun endurskinsmerkja og gefa í dag mörg þúsund merki á ári til skólabarna, ungmenna og eldri borgara ásamt því að færa leikskólum endurskinsvesti fyrir litla fólkið sem notuð eru í vettvangsferðum.  Reglulega framkvæma slysavarnadeildir og björgunarsveitir könnunina „Öryggi barna í bílum“.  Umferðaslysavarnir, reiðhjól og hjálmanotkun barna eru meðal þess sem félagið hefur beitt sér fyrir og staðið þar í fararbroddi.  Nýbakaðir foreldrar fá í ungbarnaeftirliti hjá heilsugæslustöðvum bæklinginn „Er öryggi barnanna tryggt á þínu heimili?“ frá félaginu og fjölmargar slysavarnadeildir færa nýbökuðum foreldrum ungbarnagjafir með forvarnarorðum og nú er á áætlun að færa þær upplýsingar í sjallform þannig að ungir foreldrar hafi varnarorð og ráðleggingar Slysavarnafélagsins Landsbjargar við hendina í snjallsímanum sínum.  Einingar félagsins standa oft fyrir ibúafræðslufundum og námskeiðum í sínu nærsamfélagi þar sem fagfólk er fengið til liðs með forvarnir og góð ráð.  Margir eldri borgarar hafa fengið heimsóknir frá slysavarnafélögum þar sem heimili þeirra eru tekin út með tilliti til slysahættu. Slysavarnafélagar hafa skoðað opin leiksvæði og umhverfi skóla og gert  tillögur til úrbóta til bæjar- og sveitafélaga.   Stór þáttur í starfi félagsins í dag eru slysavarnir ferðamanna en félagið rekur verkefnið Safetravel þar sem upplýsingamiðstöð, upplýsingavefurinn safetravel.is og upplýsingaskjáir um land allt upplýsa ferðamenn og benda þeim á hættur sem leynast á ferðalagi þeirra.  Björgunarsveitir ásamt slysavarnafélögum standa hálendisvakt allt sumarið í Landmannalaugum, á Sprengisandi og Drekasvæði og aðstoða erlenda og innlenda ferðamenn.

Á hausti komandi heldur Slysavarnafélagið Landsbjörg ráðstefnu um slysavarnir og kallar þar til liðs við sig fagfólk og áhugasama um slysavarnir til samtals og ráðagerða.  Upplýsandi ráðstefna um slysavarnir í sinni víðustu mynd.

Í hartnær 100 ár hafa þúsundir sjálfboðaliða lagt fram óteljandi vinnustundir í þeim tilgangi að gera umhverfið okkar öruggara og koma í veg fyrir slys hjá samborgurunum og þó að sjálfboðaliðarnir okkar eldist og hverfi úr starfi koma nýir til starfa og félagið heldur úti öflugri þjálfun og námskeiðahaldi fyrir sitt fólk.  Þekkingin heldur áfram að vera til innan Slysavarnafélagsins Landsbjargar kynslóð fram af kynslóð og það er alltaf pláss fyrir nýtt fólk sem brennur fyrir slysavörnum og hefur það að markmiði að stuðla að öruggara samfélagi.

Það er dýrt að reka björgunarsveit og viðhalda öllum tækjum og tólum sem til þarf við leit og björgun.  Þetta vita slysavarnafélagar mæta vel og taka sig því reglulega til og styrkja starf björgunarsveita með fjárframlögum.  Í dag færðu félagar í  Slysavarnadeildinni Vörðunni á Seltjarnarnesi Björgunarsveitinni Ársæl í Reykjavík og Björgunarsveitinni Kili á Kjalarnesi rausnarlegar upphæðir til að efla starf sveitanna við leitarstörfin.

Slysavarnadeildin á Dalvík ákvað að gera ungum börnum hátt undir höfði.  Heyrnin er mikilvæg en hún skerðist ef ekki er að gáð. Mikill hávaði, s.s. eins og á tónleikum, flugeldasýningum, á gamlárskvöld, viðvarandi hávaði heima fyrir, í verslunarmiðstöðvum og í umferðinni, geta skemmt heyrn ungra barna. Við erum almennt séð ekki nógu vakandi fyrir þessari hættu. Heyrnaskjól draga verulega úr hávaða og lítil eyrum þurfa á þeim að halda.  Starfsmenn Heilsugæslunnar á Dalvík munu afhenda heyrnaskjólin fyrir hönd deildarinnar þegar barn kemur í 6 mánaða skoðun og það er von Slysavarnafélaga að foreldrar á Dalvík noti heyrnaskjólin þegar við á.

Slysavarnadeildin á Dalvík lætur að sér kveða þegar kemur að slysavörnum og viðbrögðum við slysum. Á dögunum afhentu stjórnarmenn Snæþóri Arnþórssyni formanni Skíðafélags Dalvíkur gjöf.

Við fengum ábendingu um að skíðafélaginu vantaði uppblásna sjúkraböru sem nýtist vel til að flytja slasaðan einstakling. Búnaðurinn er geymdur í bakpoka sem einn maður getur borið. Tæknin er einföld, börurnar eru loftæmdar, þær laga sig að líkamanum og styðja við hann líkt og spelkur gera. Von okkar er að þessi gjöf komið að góðum notum en jafnframt að það þurfi sjaldan að nota hana.

Snjallsímaforritið 112 ICELAND er afar einfalt i notkun og hefur tvennskonar virkni. Annarsvegar er hægt að kalla á aðstoð ef um slys eða óhapp er að ræða. Hinsvegar að skilja eftir sig „slóð“ en slíkt má nota ef óttast er um afdrif viðkomandi og leit þarf að fara fram.

Forritið leysir ekki af hólmi önnur öryggistæki eins og neyðarsenda og talstöðvar. Er fyrst og fremst viðbót sem nýtist þeim sem nota snjallsíma. Ekki er þörf á gagnasambandi til að nota forritið. Hefðbundið GSM samband dugar.

112 ICELAND má nota bæði hérlendis og erlendis. Samskiptin eru þó alltaf við 112 á Íslandi en sértu erlendis hafa þeir samband við viðbragðsaðila í því landi sem þú ert í.

Hægt er að sækja foritið hér: http://safetravel.is/is/112-iceland-app/

 

Hvernig samfélag er öruggt samfélag og hvað er hægt að gera til að gera samfélag öruggt til að búa í? Margt kemur upp í hugann þegar slík spurning er borin fram. Við viljum t.d. að börnin okkar geti leikið sér á öruggum leikvöllum, að öryggismál skólanna séu í lagi og að þar sé unnið gegn einelti. Við viljum að við það að verða gamall/gömul í samfélaginu finni maður fyrir öryggi, t.d. að við getum verið örugg þegar við erum að hreyfa okkur utandyra m.a. vegna þess að í göngu- og gatnakerfinu sé tekið tillit til okkar. Við viljum að börnum og unglingum í samfélaginu sé gert auðvelt að ástunda heilbrigt líferni og að allt sé gert til að koma í veg fyrir að þau byrji að reykja, drekka eða nota önnur fíkniefni, svo fá dæmi séu nefnd.

Alþjóðaheilbrigðismálastofnunin, WHO, telur þetta alvarlega ógn við efnahagslega og félagslega framþróun í heiminum. Til að bregðast við þessu hefur stofnunin m.a. beitt sér fyrir því að nærsamfélög skilgreini sig sem Örugg samfélög og grípi til nauðsynlegra aðgerða til að draga úr hættunni á slysum og ofbeldi.

Öruggt samfélag getur verið af hvaða stærð eða gerð sem er, borg, bær eða hreppur, en einnig hverfi innan borgar. Tengslin á milli íbúa, stofnana og fyrirtækja eru gjarnan sterk og oft mjög náin í nærsamfélaginu, sem er mikilvægt í öllu forvarnarstarfi. Einnig tekst oft að virkja fólk í nærsamfélaginu til verka sem ekki er hægt að ná fram á stærri svæðum.

Úr grein eftir Rósu Þorsteinsdóttir, verkefnisstjóri slysavarna, Lýðheilsustöð.

Meira um verkefnið öruggt samfélag á síðu Landlæknis

http://www.landlaeknir.is/um-embaettid/greinar/grein/item14673/Oruggt-samfelag

 

Eftir atburði janúarmánaðar sl. hafa yfirvöld stefnt á að fjölg­a ör­ygg­is­mynda­vélum í miðborg Reykja­vík­ur, bæta lýs­ingu á svæðinu, auka sýni­leika lög­reglu og áfram­hald­andi sam­starfi við eig­end­ur skemmti­staða um of­beld­is­lausa og ör­ugga skemmti­staði.  Þetta kemur fram í tilkynningu frá lögreglunni á höfuðborgarsvæðinu.  Þar seg­ir enn frem­ur, að lög­regl­an og borg­ar­yf­ir­völd hafi átt gott sam­starf þegar ör­yggi borg­ar­anna er ann­ars veg­ar og svo verði áfram. Þá sé skemmst að minn­ast sam­komu­lags um of­beld­is­lausa og ör­ugga skemmti­staði, sem skrifað var und­ir í lok síðasta árs. Að því standa lög­regl­an, borg­ar­yf­ir­völd, slökkviliðið og Sam­tök ferðaþjón­ustu (SAF) fyr­ir hönd skemmti­staða í Reykja­vík. Sam­komu­lagið miðar að því að auka ör­yggi á og við skemmti­staði með auknu  sam­starfi milli þess­ara aðila með sam­eig­in­lega hags­muni að leiðarljósi.

 

Félagar í slysavarnadeildum eru fólk á öllum aldri af báðum kynjum sem tekur samfélagslega ábyrgð.  Fólk sem vill leggja hönd á plóg með Slysavarnafélaginu Landsbjörg en kýs að leggja áherslu á slysavarnir og forvarnastarf í samstarfi við björgunarsveitir.  Meginmarkmið slysavarnadeilda um land allt er að koma í veg fyrir slys og óhöpp ásamt því  að vera í góðu samstarfi við björgunarsveitina í sínu sveitarfélagi, m.a. við fjáraflanir eða vegna útkalla og annarra aðgerða.  Öryggi á heimilum svo sem eldvarnir og slys á börnum og öldruðum, endurskinsmerki/vesti í leikskóla og grunnskóla, hjálmanotkun, notkun öryggisbelta og barnabílstóla, öryggi leiktækja á almenningssvæðum og svo mætti lengi áfram telja.  Hver slysavarnadeild starfar sjálfstætt og eru verkefni deildanna oft ólík þar sem þörfin er mismunandi eftir byggðarlögum.

Slysavarnadeildin í Reykjavík er mikilvægur hluti af neti sjálfboðaliða sem sinna björgunarstörfum og slysavörnum á Íslandi. Félagatal deildarinnar telur á sjöunda tug sjálfboðaliða sem gefa mismikið af tíma sínum til starfsins. Einhverjir félagar taka þátt í nær öllum verkefnum deildarinnar, aðrir velja sér verkefni eftir aðstæðum og áhuga á meðan sumir kjósa að halda sér til hlés og styrkja starfið með félagsgjaldi eða styrk.  Félagar eru frá aldrinum 12 ára og upp úr og af báðum kynjum.  Deildin tekur þátt í landsverkefnum á borð við heimsóknir í leikskóla, Reiðhjóla- og hjálmaskoðun í grunnskólum á vorin, heimsóknum til heldri borgara. Einnig erum við öflug í að afla fjár, höldum námskeið fyrir félaga okkar og vinnum með  björgunarsveitunum á höfuðborgarsvæðinu.

Á næstunni höfum við ákveðið að taka virkan þátt í slysavörnum ferðamanna (Savetravel.is) og erum stöðugt að endurskipuleggja starfið okkar. M.a. tökum við þátt í hálendisvakt björgunarsveita í sumar  og framundan eru spennandi námskeið fyrir félaga og nýja vini okkar.  Ekki má gleyma því að stór hluti af starfinu hjá okkur er félagslegi þátturinn og að má með sanni segja að okkur finnst gaman að vinna í hópi skemmtilegra félaga að verkefnum sem skipta gríðarlega miklu máli fyrir samfélagið okkar og um leið erum við hluti af þessum stórkostlegu samtökum sem Slysavarnafélagið Landsbjörg er.

Slysavarnadeildin á Akureyri afhenti skíðasvæðinu í Hlíðarfjalli öryggishlið fyrir snjóflóðaýla um liðna helgi. Hliðið var sett upp við ofan við Stromplyftuna, efstu skíðalyftu svæðisins en þaðan halda skíðamenn gjarnan af stað ætli þeir að skíða utan hefðbundinna brauta fjallsins. Í hliðinu er sjálfvirkur búnaður sem lætur skíða- og göngufólk vita hvor snjóflóðaýlar þeirra séu í lagi eða rétt stilltir, ásamt því að veita almennar upplýsingar um snjóflóðavarnir.

Snjóflóðaýlir er mikilvægt öryggistæki sem sífellt fleira göngu, skíða og sleðafólk ber á sér. Ýlirinn sendir frá sér útvarpsbylgjur sem auðveldar leit að fólki í snjóflóðum. Við afhendinguna sagði Halldóra Bjarney Skúladóttir, formaður Slysavarnadeildarinnar á Akureyri að hliðið væri veigamikill þáttur í að auka vitund fólks um mikilvægi snjóflóðaýla meðal þeirra sem stunda fjallamennsku á vetrum.